Itsinda ry’abadepite Hon. Mbonimana Gamariël na Hon. Ahishakiye Médiatrice bari muri Komisiyo y'Uburezi, Ikoranabuhanga, Urubyiruko n'Umuco mu nteko ishinga amategeko umutwe w’abadepite, basuye akarere ka Kayonza.

Barimo kuganira n’ubuyobozi bw’akarere mu nama yabahuje ku birebana n'ireme ry'uburezi, imyigire y'abanyeshuri n'ibibazo bituma ireme ry'uburezi ritagerwaho uko byifuzwa. Barasura kandi bimwe mu bigo by’amashuri, mu rwego rwo kuganira n'abarimu bareba ibibazo bibangamiye ireme ry'uburezi n'uko byakemuka.

Iyi nama yitabiriwe n’abanyamabanga nshingwabikorwa b’imirenge, inzego z’umutekano, abakozi bashinzwe uburezi ku karere no mu mirenge ndetse n’abayobozi b’ibigo by’amashuri bahagarariye abandi muri buri murenge.

Depite Mbonimana Gamariël yasobanuye ko nka komisiyo y’uburezi hari ibibazo babonaga bifite aho bihuriye n’ireme ry’uburezi, akaba ariyo mpamvu baje kureba uko bihagaze, kugirango nabo nk’intumwa za rubanda bazakore ubuvugizi aho bukenewe.

Bimwe muribyo ni ukureba uko ubwitabire bw’abarimu buhagaze n’impamvu z’ingenzi zituma basiba akazi, kureba uko imibare y’abana bata ishuri ihagaze mu mashuri y’inshuke, abanza n’ayisumbuye, kureba uko gufatira ifunguro ku ishuri bihagaze ku banyeshuri biga mu mashuri y’uburezi bw’ibanze bw’imyaka 9 na 12 bihagaze.

Hari kandi kureba uruhare rw’ababyeyi mu kunganira inkunga itangwa na Leta mu mashuri, kureba uko ibikorwa remezo: amazi, amashanyarazi, umuyoboro wa internet n’ibibuga by’imikino byakwirakwijwe mu mashuri y’inshuke, abanza n’ayisumbuye, imbogamizi abafite ubumuga bahura nazo mu myigire n’ibindi

Ubuyobozi bw’akarere bwagaragarije aba Badepite ishusho rusange y’uko byose bihagaze ku karere ka Kayonza, habaho n’umwanya wo kungurana ibitekerezo. Umuyobozi w'akarere ka Kayonza Murenzi Jean Claude yasobanuye ko hari ingamba zitandukanye zafashwe kugirango ahakiri ibibazo bigende bikemuka.

Avuga ku kibazo cy’ubucukike, yagize ati: ari mu rwego rwa Leta idufasha kugirango tubone ibyumba bitewe n’ubushobozi buba bwabonetse, ndetse no ku bufatanye na Banki y’Isi, kugera muri Kamena uyu mwaka, tuzaba twubatse ibyumba 100 mu rwego rwo guhangana n’iki kibazo