Uyu munsi abakandida-Senateri 9 bo mu ntara y’Iburasirazuba biyamamarije mu karere ka Kayonza. Aba bakandida-Senateri ni: Mupenzi George, Bideri John Bons, Bagwaneza Theopiste, Nkurunziza Alexia, Rucyemanganizi Cyprien, ACP (Rtd) Ndahiro Joel, Mukandamage Marcelline, Mukeshimana Clotilde na Nsengiyumva Fulgence.

Ni igikorwa cyari cyitabiriwe n’abagize inteko itora barimo: Abagize inama njyanama y’Akarere n’abagize biro z’inama njyanama z’imirenge 12 igize akarere.

Visi Perezidante wa Komisiyo y’igihugu y’amatora Madamu Mukamazela Rosalie yashimiye uburyo abakandida bitwaye muri iki gikorwa ndetse n’uburyo abanyarwanda muri rusange bamaze kugira umuco wo kwitwara neza mu matora.

Madamu Mukamazela Rozalie yasabye abakandida-senateri ko mu gihe cyo kwiyamamaza bagomba kubahiriza amategeko n’amabwiriza agenga amatora kugira ngo amatora akomeze kugenda neza, bakirinda imvugo cyangwa imyitwarire yahungabanya ubumwe bw’abanyarwanda n’umutekano.

Biteganyijwe ko amatora y’abasenateri azaba kuwa mbere tariki ya 16/09/2019. Muri aba bakandida senateri bahagarariye Intara y’I Burasirazuba, hakaba hazatorwamo abasenateri 3 bazahagararira iyi ntara.