Umuyobozi w’Akarere ka Kayonza, Nyemazi John Bosco, yakiriye Abasenateri Dr. Nyinawamwiza Laetitia na Mugisha Alexis, bari mu ruzinduko mu Karere hagamijwe kugenzura ishyirwa mu bikorwa ry’ingamba za Guverinoma zo korohereza abaturage kubona ibicanwa bitangiza ibidukikije.

Ni igikorwa cyabaye kuri uyu wa Gatatu, aho Ubuyobozi bw’Akarere bwasangije aba Basenateri ishusho rusange y’ibikorwa bimaze kugerwaho bijyanye n’iyi gahunda, harimo no gukorana n’abafatanyabikorwa batandukanye mu gutanga ibicanwa bisimbura inkwi zisanzwe zikoreshwa, gushinga inganda ziciriritse zikora amakara atangiza ibidukikije, ndetse no gukangurira abaturage gukoresha imbabura n'amashyiga akoresha inkwi nke, gukoresha ingufu imirasire y’izuba mu guteka, biogas n’ibindi.

Aba Basenateri banitabiriye inteko y’abaturage yabereye mu Kagari ka Nyagatovu, Umurenge wa Mukarange, aho bagiranye ibiganiro n’abaturage bigamije gusobanura inyungu zo kwirinda ibicanwa bisenya ibidukikije, nk’inkwi zituruka mu ishyamba zidatunganyije, ndetse no gushimangira uruhare rw’umuturage mu kurinda ibidukikije.

Senateri Dr. Nyinawamwiza Laetitia yavuze ko "Guverinoma yashyize imbere gahunda zo kurengera ibidukikije binyuze mu buryo bunafasha abaturage kugira imibereho myiza, kandi umuturage ni we wa mbere ugomba kubigiramo uruhare. Ibi ni ibicanwa bigezweho, byongera ubuzima bwiza no kugabanya imyuka ihumanya ikirere."

Umuyobozi w’Akarere yashimangiye ko Kayonza yiyemeje gukomeza gufatanya n’inzego zitandukanye mu gutuma iyi gahunda igerwaho ku buryo bugaragara kandi igatanga igisubizo mu kubungabunga ibidukikije mu buryo burambye.

Akarere ka Kayonza gakomeje gushyira imbere ibikorwa bigamije kurengera ibidukikije no guteza imbere imibereho myiza y’abaturage buri wese abigizemo uruhare.