Mu rwego rwo kwimakaza imiyoborere ishingiye ku bufatanye n’imikoranire ya hafi hagati y’inzego Z’ibanze, abayobozi mu nzego zitandukanye kuva ku Mudugudu kugera ku rwego rw'Umurenge mu Murenge wa Murundi bagiranye ibiganiro n’ubuyobozi bw’Akarere ka Kayonza bigamije kurebera hamwe aho bageze mu ishyirwa mu bikorwa ry’inshingano zabo no gufata ingamba nshya zigamije guteza imbere imibereho y’abaturage.

Ibi biganiro byahuje ubuyobozi bw’Umurenge n’abayobozi b’utugari n’imidugudu, hagamijwe kugenzura ishyirwa mu bikorwa ry’inshingano zabo za buri munsi, kunoza imitangire ya serivisi, ndetse no kwihutisha ibikorwa biteza imbere abaturage.

Nyuma y’isuzuma ry’ibimaze kugerwaho n’ibigikenewe kunozwa, hafashwe ingamba zitandukanye zirimo:

Gukemura ibibazo bijyanye n’ubutaka n’imitangire ya serivisi zirebana nabwo

Gukomeza ubukangurambaga ku bwisungane mu kwivuza

Gushyira imbaraga mu gukurikirana imishinga yatewe inkunga y’abaturage

Guhuza imbaraga mu kurwanya ibiyobyabwenge n’ibindi bibangamira umutekano

Gushyira imbere uruhare rw’abaturage mu bikorwa bibagenewe

Ubuyobozi bw’Umurenge wa Murundi bwashimangiye ko ibiganiro nk’ibi ari umusingi ukomeye mu kwimakaza imiyoborere myiza ishingiye ku muturage. Bugaragaza ko ubufatanye n’ubushake bwo gukorera hamwe ari byo bizatuma impinduka zigaragara mu mibereho n’iterambere ry’abaturage.

Iyi gahunda ni kimwe mu bikorwa Akarere ka Kayonza kashyize imbere mu kwimakaza gahunda y’ubuyobozi bushingiye ku muturage.