Ubuyobozi bw'Akarere bwegeree abaturage, butanga ibisubizo ku bibazo bishingiye ku butaka

Ku wa 30 Nzeri 2025, Umuyobozi w’Akarere ka Kayonza, Nyemazi John Bosco, ari kumwe n’itsinda ry’abakozi b’Akarere n’umufatanyabikorwa Landesa, basuye abaturage bo mu Murenge wa Mwiri, Akagari ka Kageyo mu rwego rwo kubegereza serivisi no gukemura ibibazo byabo bishingiye ku butaka.

Muri iki gikorwa, abaturage bagaragarije ubuyobozi ibibazo birimo kutamenya imbibi neza no kudahuza amakuru ari ku byangombwa by’ubutaka n’ubutaka basanganywe. Ubuyobozi bwabasobanuriye uburyo bwo gukosora imbibi no guhuza amakuru ku buryo bwemewe n’amategeko.

Agaragaza intego y’iki gikorwa, Umuyobozi w’Akarere ka Kayonza Nyemazi John Bosco yagize ati “Nk’ubuyobozi, dufite inshingano zo kumva ibibazo by’abaturage tukabishakira ibisubizo bitanga ituze n’iterambere. Gukemura ibibazo by’ubutaka ni inzira yo guca amakimbirane no gushyigikira iterambere rirambye kuko bituma ubifite ubutaka agira uburenganzira busesuye bwo kubukoresha ibyo yifuza kandi mu gihe ashakiye.”

Ku ruhande rw’abaturage, Mukamana Vestine wo mu Kagari ka Kageyo yashimye ubuyobozi kuba bwabegereye agira ati “Twari dufite impungenge ku byangombwa by’ubutaka, ariko ubu turasobanukiwe kandi dufite icyizere ko ibibazo byacu bigiye gukemuka.”

Kugeza ubu, muri iyi gahunda yihariye yo gukemura ibibazo by’ubutaka, hari ibyakozwe bifatika birimo: Ubutaka bushya bwanditswe bungana na Hegitari 12,737, Imbibi zakosowe; 18,076, Amakuru y’ubutaka yakusanyijwe; 19,879

Ibi bikorwa bigamije kongera umutekano w’ubutaka, kugabanya amakimbirane no guteza imbere imiryango binyuze mu gucunga neza umutungo.