Kuri uyu wa 22 Gicurasi 2025, Mu rwego rwo kunoza imicungire y’ubutaka no gukemura burundu amakimbirane ashingiye ku mbibi, Akarere ka Kayaonza katangije ku mugaragaro gahunda yihariye igamije kwandika ubutaka butari bwanditse no gukemura ibibazo by’imbibi hagati y’abaturage.

Iki gikorwa cyatangijwe ku mugaragaro n’Umuyobozi w’Akarere, Nyemazi John Bosco, ari kumwe na Madamu Marie Grace Nishimwe, Umuyobozi w’Ikigo cy’Igihugu gishinzwe Ubutaka (National Land Authority), ndetse n’uhagarariye umuryango mpuzamahanga LANDESA ku rwego rw’Afurika.

Iyi gahunda izamara amezi ane ikazashyirwa mu bikorwa mu Mirenge yose igize Akarere ka Nyamagabe, binyuze mu bufatanye bw’inzego z’ubuyobozi, inzego z’ibanze, n’abafatanyabikorwa.

Gahunda yatangijwe igamije:Kwandikisha ubutaka butari bwanditse no kurushaho gufasha abaturage kubona ibyangombwa byemewe n’amategeko, Gukemura amakimbirane y’ubutaka, cyane cyane ashingiye ku mbibi n’umwihariko w’ubutaka, Kwegereza abaturage serivisi z’ubutaka, hagamijwe kunoza ireme ry’imicungire n’imikoreshereze yabwo no kurushaho guteza imbere imibereho n’ubukungu bw’abaturage binyuze mu kugira ubutaka bufite ibyangombwa. 

Umuyobozi w’Akarere, Nyemazi John Bosco, yashimangiye ko iyi gahunda ari igisubizo kirambye ku bibazo abaturage bakunze guhura na byo mu bijyanye n’imicungire y’ubutaka.

“Turifuza ko buri muturage agira ubutaka bwujuje ibisabwa n’amategeko kandi bufite imbibi zisobanutse. Ibi si ugukemura amakimbirane gusa, ni ugufungurira abaturage amahirwe y’iterambere n’imibereho myiza, kandi bizanafasha Akarere kacu gukoresha ubutaka icyo bwagenwe.”  Nyemazi John Bosco.

Umuyobozi w’Ikigo cy’Igihugu gishinzwe Ubutaka, Marie Grace Nishimwe, yagaragaje ko iyi gahunda ari intambwe ikomeye mu ishyirwa mu bikorwa ry’amabwiriza y’Igihugu ku butaka, anashimira ubufatanye bw’inzego zose asaba abaturage kwitabira iyi gahunda kubera ko ije gukemura ibibazo bafite. 

Umuhuzabikorwa wa LANDESA ku rwego rw’Afurika na we yemeje ko uyu muryango uzakomeza gutanga ubufasha mu buryo bw’ubujyanama, ikoranabuhanga n’ubushobozi mu bijyanye n’iyandikwa ry’ubutaka no gumekura ibibazo birebana nabwo.  

Akarere ka Kayonza karakangurira abaturage bose bafite ubutaka butanditse cyangwa bafite ibibazo by’imbibi, kwegera ubuyobozi bw’Imirenge n’inzego z’ibanze kugira ngo bahabwe ubufasha buteganyijwe muri iyi gahunda.