Mu gitondo cy’uyu munsi ntariki 09/09/2019, abagize inama y'umutekano itaguye y'Intara y’I Burasirazuba bagiranye inama yaguye n'abagize inama y'umutekano itaguye y'Akarere, n'abakozi b'Akarere harimo abakorera ku cyicaro cy'akarere bose, bamwe mu bakorera mu mirenge (abanyamabanga nshingwabikorwa b'imirenge, abashinzwe imibereho myiza, ubutaka, irangamimerere, ba goronome, ba veterineri,…) ndetse n'abanyamabanga nshingwabikorwa b'utugari twose

Mu mpanuro ze, Guverineri w’Intara y’Iburasirazuba Mufulukye Fred yagize ati: “Ntago dushobora kugera ku cyerekezo cy’igihugu cyacu tutari ikipe imwe, kandi kuba ikipe imwe, ntago bikwiriye kuba mu magambo. Buri muntu agomba kubigiramo uruhare, hari abareba iby’ubuhinzi, uburezi, ubuvuzi, iby’iterambere, iby’amakoperative n’abandi. Uko abakinnyi 11 bagize ikipe y’umupira w’amaguru baba bari mu kibuga buri wese afite umwanya akinaho, ni nako namwe mugomba kuzuzanya hagatu yanyu”.

Yakomeje muri aya magambo: “Icyo mbasaba mwese, ni uko buri mukozi agenda akajya mu ikipe imwe y’akarere, akaba umukinnyi muri iyo kipe. Buri wese ahangayikishwe n'ibitaragezweho mu nshingano ze, aharanire ko ahakiri ibibazo bikemuka, bityo icyerekezo 2020 tuzakinjiremo twarageze ku ntego twihaye, cyane cyane ko tubura amezi make tukinjira muri iki cyerekezo. Dukorere ku ndangagaciro yo gukunda igihugu kuko ni icyacu tugomba kugira aho tugikura n'aho tukigeza, niyo mpamvu tugomba gukorera hamwe nk'ikipe tugatahiriza umugozi umwe, kandi tugatanga serivisi nziza dukorera umuturage, ntasiragizwe”.