Baturage b’akarere ka Kayonza, turabashishikariza kwitabira gahunda yo gutanga ibitekerezo bizatoranywamo ibizinjizwa muri gahunda y'ibikorwa y’Akarere ya 2020/21.

Mwanatanga ibitekerezo mubinyujije kuri uru rubuga no ku nkuta zacu ku zindi mbuga nkoranyambaga.

Uyu munsi mu turere twose tw’igihugu haratangira gukusanywa ibitekerezo by’abaturage bizashyirwa muri gahunda y’ibikorwa 2020/21 y'Uturere ndetse  no kubagaragariza uko ibyo batanze umwaka ushize (2019/20) byinjijwe mu ngengo y'imari, ibitaragiyemo n'impamvu.

Ku rwego rw'Akarere kacu iyi gahunda iratangirizwa mu murenge wa Ruramira, akagari k'Umubuga.

Abaturage bazatanga ibitekerezo binyuze mu nama z’Umudugudu, Inteko z’abaturage, umuganda, inyandiko zigezwa ku buyobozi bw’Akagari cyangwa Umurenge, ku mbuga nkoranyambaga z’Akarere, bashobora kandi no guhamagara kuri nomero itishyurwa y’Akarere 4157.

Iyi gahunda yo gukusanya ibitekerezo by’abaturage izasozwa mu mpera z’Ugushyingo 2019; ibitekerezo byose bikusanyirizwe ku Mudugudu, bigezwe ku Kagari, nako kabishyikirize Umurenge maze bihabwe Akarere, hanyuma kabisesengure iby’ingenzi byinjizwe muri gahunda y’ibikorwa y’umwaka wa 2020/21 y’Akarere hagendewe  ku mikoro gafite no ku bishobora gukorwa n’abaturage mu bushobozi bwabo.