Ku bufatanye bw’Akarere ka Kayonza na Minisiteri ya Siporo, kuri uyu wa 21 Ukuboza 205, hasojwe igikorwa cyo gutoranya no guteza imbere impano z’abana bari munsi y’imyaka 15 bakina imikino itandukanye, cyabereye mu Kigo cy’ishuri cya ES Kayonza Modern, iki cyumweru cyahariwe guteza imbere impano za siporo kizwi nka “Isonga National Sports Talent Week.”

Iki gikorwa cyamaze iminsi itanu, cyitabiriwe n’abana 186 baturutse mu Mirenge itandukanye y’Akarere, bahawe amahugurwa n’abatoza b’inzobere hagamijwe kubafasha kugaragaza no kunoza impano zabo mu mikino itandukanye. Abana bitwaye neza kurusha abandi bahembwe mu rwego rwo kubatera inkunga no kubashishikariza gukomeza kuzamura impano bafite.

Umuyobozi w’Akarere w’Agateganyo, Hategekimana Fred, yashimiye abana bose bitabiriye iki gikorwa ku bushake n’umurava bagaragaje, anashimira ababyeyi babohereje muri iyi gahunda, aboneraho kubasaba gukomeza gushyigikira abana babo mu rugendo rwo kwita ku mpano zabo.

Yagize ati: “Kugira ngo impano igere ku musaruro, bisaba imyitwarire myiza, gutsinda ku ishuri, kumenya indimi, kugira umuco no kurangwa n’ikinyabupfura. Ibi byose bituma impano itazagupfira ubusa, ahubwo ikaba inkingi y’ejo hazaza heza.”

Ubuyobozi bw’Akarere bwatangaje ko iki gikorwa kigamije gufasha abana kugaragaza impano zabo hakiri kare, no gutegura ejo hazaza h’iterambere rya siporo, binyuze mu bufatanye n’inzego zitandukanye, harimo Minisiteri ya Siporo n’abandi bafatanyabikorwa.

Akarere kemeje ko kazakomeza gushyigikira gahunda ziteza imbere impano z’urubyiruko, by’umwihariko mu mikino, mu rwego rwo guteza imbere imibereho myiza y’abaturage no guteza imbere impano ziri mu Gihugu muri rusange.