Kuri uyu wa Kabiri tariki ya 10 Kamena 2025, Ku kigo cy’urubyiruko cya Kayonza habereye inteko rusange y’Inama y’Igihugu y’Urubyiruko yahuje urubyiruko rwahagarariye abandi kuva ku rwego rw’Akarere kugera ku Mudugudu, hamwe n’abafatanyabikorwa batandukanye bafasha urubyiruko.

Intego y’iyi nteko kwari ugusesengura ibikorwa byagezweho mu mwaka wa 2024/2025, gutanga icyerekezo cy’ibikenewe gukorwa mu mwaka wa 2025/2026, no kungurana ibitekerezo n’inama zigamije iterambere rirambye ry’urubyiruko.

Muri iyi nama, hatanzwe ibiganiro by’ingirakamaro ku nsanganyamatsiko zitandukanye zirimo:

• Kwihangira imirimo no guteza imbere udushya duherekejwe n’amahirwe aboneka ku rwego rw’Akarere;

• Imyitwarire iboneye ikwiye urubyiruko, ibarinda ingeso mbi n’ibyaha;

• Umutekano n’uruhare rw’urubyiruko mu kuwusigasira n’ibindi.

Visi Meya ushinzwe Imibereho myiza y’abaturage mu Karere ka Kayonza, Harelimana Jean Damascene, wari umushyitsi mukuru muri iyi nteko, yashimye uruhare rw’urubyiruko mu bikorwa by’iterambere, abasaba kurushaho gukoresha neza amahirwe abarimo. 

Yagize ati "Umurimo uko waba umeze kose uteza imbere uwukora iyo awukoze neza. Urubyiruko mufite imbaraga n’ubushake bukenewe mu kwihangira imirimo no guhindura imibereho y’abaturage."

Yibukije kandi urubyiruko ko Akarere ka Kayonza gafite amahirwe menshi mu buhinzi, ubukerarugendo, imyuga n’ibindi bikorwa by’ubukungu, abasaba kudapfusha ubusa ayo mahirwe.

Abitabiriye inteko bagaragaje ko bungutse byinshi, banashimangira ko bagiye kuba intangarugero mu guhindura imyumvire y’abaturage.