Kuri uyu wa Gatanu tariki 12/12/2025, mu kigo cy’ishuri cya GS Adelaide TSS, kigisha imyuga itandukanye giherereye mu Murenge wa Kabare, mu Karere ka Kayonza, hizihirijwe Umunsi Mpuzamahanga wa Mwarimu ku nsanganyamatsiko igira iti “Uburezi ni umwuga usaba ubufatanye.”

Ibi birori byitabiriwe n’Umuyobozi w’Akarere w’Agateganyo, Hategekimana Fred, ari kumwe n’abagize inzego z’umutekano, abayobozi mu nzego z’ibanze n’abarimu. Mbere yo kwizihiza uyu munsi ku mugaragaro, abitabiriye basuye ahakorerwa imyitozongiro, by’umwihariko ahigishirizwa amasomo y’umwuga wo guteka, bareba uko abanyeshuri bahabwa ubumenyi ngiro bubafasha kwitegura isoko ry’umurimo.

Umuyobozi w’Akarere ka Kayonza w’Agateganyo, Hategekimana Fred, yashimye byimazeyo uruhare rukomeye rw’abarimu mu kubaka Igihugu, agaragaza ko iterambere ridashoboka hatabayeho uburezi bufite ireme.

Yagize ati: “Uyu munsi ni umwanya mwiza wo kongera gushima no guha agaciro umurimo ukomeye mwarimu akora mu kubaka Igihugu. Nta terambere, nta bukungu, nta muryango ukomera udateye imbere mu myigire n’uburezi, kandi uburezi ntabwo bwabaho hatari umwarimu ufite ubushobozi.”

Muri ibi birori kandi, Umurenge wa Kabare wahawe icyemezo cy’ishimwe kubera umusaruro mwiza wagaragaje mu bizamini bya Leta by’umwaka w’amashuri wa 2024/2025, aho wageze ku ijanisha rya 96.9% ry’abanyeshuri batsinze, bigaragaza ubufatanye bwiza hagati y’abarimu, abayobozi b’amashuri, abanyeshuri n’ababyeyi.

Meya Hategekimana Fred yagaragaje ko uwo musaruro ari ikimenyetso cy’uko uburezi bufite ireme bushoboka iyo habayeho ubufatanye bw’inzego zose bireba, ashimangira ko Akarere ka Kayonza kazakomeza gushyigikira amashuri, cyane cyane ayigisha imyuga n’ubumenyingiro, mu rwego rwo gufasha urubyiruko kwitegura neza ejo hazaza.

Ku ruhande rw’abarimu, bishimiye kwizihizwa uyu munsi, bagaragaza ko ari amahirwe yo kongera kwibukiranya inshingano bafite zo kurera no gutoza abanyarwanda b’ejo hazaza, basaba ko ubufatanye hagati y’inzego z’ubuyobozi, ababyeyi n’abafatanyabikorwa b’uburezi bwakomeza kongerwa.