Umunyamabanga nshingwabikorwa wa komisiyo y'ubumwe n'ubwiyunge Fidèle Ndayisaba, abakomiseri ndetse n’abakozi muri iyi komisiyo basuye akarere ka Kayonza mu rwego rwo kugaragaza ibyavuye mu bushakashatsi bwakozwe muri Gashyantare 2019, bwari bugamije gusesengura no gukora icukumbura ku bibazo byabangamira ubumwe n'ubwiyunge

Mu bibazo byari byagaragaye, harimo ikibazo cy'ibyaha by'ingengabitekerezo ya jenoside n'ibifitanye isano nayo, kwirebera no kurebera abandi mu ndorerwamo z'amoko, ndetse n’ibibazo bishingiye ku mikoreshereje y'ubutaka. Yagize ati: "Ubu bushakashatsi twabukoreye mu turere twa Nyagatare, Gatsibo na Kayonza, tugamije kubisesengura no kubishakira ibisubizo. Mu karere ka Kayonza twagiye  mu murenge wa Mukarange, tukajya ahari ibibazo dufatanyije n'inzego z'ibanze. Twaganiriye n'abaturage, dusanga ibibazo biza ku isonga ari ibifitanye isano n'ingaruka za jenoside yakorewe abatutsi mu 1994".

Umuyobozi w'akarere ka Kayonza Murenzi Jean Claude mu ijambo rye, yagize ati:"Ibyagaragaye muri ubu bushakashatsi biratwereka icyakorwa kugirango dukomeze kubaka ubumwe n'ubwiyunge n'ubwo hari intambwe yatewe. Ni uruhare rwacu twese, kandi natwe abayobozi turakomeza gukora ubukangurambaga mu baturage kugirango imvugo zihembera amacakubiri zicike, twumve ko twese turi abanyarwanda, abanya-Kayonza"