Kuri uyu wa 09 Gicurasi 2025 ku bitaro by’Akarere bya Rwinkwavu habereye igikorwa cyo Kwibuka ku nshuro ya 31 Jenoside yakorewe Abatutsi mu 1994, by’umwihariko hibukwa abarwayi, abarwaza n’abaganga biciwe muri ibi bitaro muri Jenoside yakorewe Abatutsi.

Iki gikorwa kitabiriwe na Senateri Bideri John Bonds, Umuyobozi w'Akarere Nyemazi Joh n Bosco, ubuyobozi bwa IBUKA mu Karere, ubuyobozi bw’Ibitaro bya Rwinkwavu n’abakozi babyo, abagize inzego z’umutekano, abahagarariye amadini n’amatorero, abafite ababo biciwe muri ibi bitaro n’abandi.

Senateri Bideri John Bonds, wari umushyitsi mukuru muri iki gikorwa yagarutse ku ngamba zashyizweho zo kurwanya ingengabitekerezo ya Jenoside, gutoza Abanyarwanda gahunda ya Ndi Umunyarwanda, kubaka inzego zihamye z'Ubutabera no guhana ibyaha bya Jenoside yakorewe Abatutsi mu 1994.

Senateri Bideri yanibukije ko u Rwanda ari Igihugu kigendera ku mategeko bityo ko nta muntu wakoze ibyaha bya Jenoside cyangwa ugaragararwaho ingengabitekerezo yayo uzabaho byidegembya. 

Ati “Turi igihugu cyubahiriza amategeko kandi kigendera ku matego, kandi inzego z’umutekano zacu zirakora, dufite n’iziperereza. abo bashora amafaranga bagamije gupfobya Jenoside bahisha ibimenyetso bazafatwa kandi bahanwe.”

Mu butumwa butandukanye bwatanzwe bwagarutse ku mateka ya Jenoside, ubutwari ntagereranywa bw'Inkotanyi mu guhagarika Jenoside, kongera kubaka Igihugu n'abarokotse by'umwihariko no kurwanya ingengabitekerezo ya Jenoside cyane urubyiruko rugira uruhare rufatika mu kugaragaza amateka y’ukuri.