Mu rwego rwo gushishikariza aborozi gukorera inzuri n'iterambere ry'ubworozi muri rusange, mu murenge wa Murundi habereye inama y'aborozi, yayobowe n'umuyobozi w'Akarere wungirije ushinzwe ubukungu MUNGANYINKA Hope, ari kumwe n’inzego z’umutekano, umukozi wa RAB, PASP n'uwa RDDP, yitabirwa n'aborozi 112.

Abitabiriye inama baganiriye ku ngingo zitandukanye zirimo: Gukorera inzuri, Gukoresha nkunganire itangwa n'umushinga wa RDDP, Kwirinda indwara z'amatungo no Gutera ubwatsi bwiza.

Iyi nama ikaba yafashe imyanzuro ikurikira:

1. Aborozi basabwe gukorera inzuri bitarenze nibura ukwezi kwa 12/ 2019 komisiyo ikazaza kugenzura mu kwezi  kwa 2 barasoje kuzikorera.

2. Aborozi bose biyemeje kugemura amata ku ikusanyirizo, ubirenzeho agacibwa amande y'ibihumbi 50,000 Rwf n'amata akabuganizwa mu bisabo by'ikusanyirizo.

3. Mu rwego rwo kurwanya indwara z'uburondwe, aborozi biyemeje kubaka impango (Crushes) zo kogerezamo no kugira gahunda yo koza , aborozi bemeje ko inka izagaragaho uburondwe mu gihe cy'ibyumweru 2, Nyirazo azacibwa amande y'ibihumbi 50, ( 50,000 Rwf)

4. Koperative ya MUFCOS yasabye ko yakorerwa ubuvugizi kuri BRD, igakurwa muri ba bihemu, aborozi 15 bahawe amafaranga yo kugura inka bagasabwa kuyishyura, nayo ikarushaho gukora imishinga y'iterambere.

5. Gukomeza gukurikirana ba Rwiyemezamirimo bambuye koperative amafaranga y'amata.

6. Aborozi bakeneye kubaka ibiraro, ihunikiro ry'ubwatsi, Gucukura no kubakira damu, kuzitira urwuri, kugura ibicuba n'imashini zikata ubwatsi basabwe kwegera umukozi w'umushinga wa RDDP, ikabafasha guhabwa nkunganire ya 30 % kugera kuri 60%.

7. Aborozi biyemeje gufata neza ibikorwa remezo bubakiwe birimo ; imiyoboro y'amashanyarazi n'amakusanyirizo y'amata

Inama yasoje aborozi biyemeje gukorera hamwe no gukorera inzuri zabo nkaho ari umutungo wabo ntawe bawusiganya wundi.