Abaturage baragaragaza ibyishimo n’ishema byo kugira uruhare mu igenamigambi ry’Akarere, bavuga ko kubona ibitekerezo byabo bifatwa nk’umusingi w’iterambere ribegereye bituma barushaho kwizera ubufatanye bwabo n’ubuyobozi mu kwihutisha iterambere.

Mu nteko rusange z’abaturage zateraniye mu Mirenge yose igize Akarere kuri uyu wa 14 Ukwakira 2025, hatangirijwe ukwezi kwahariwe kwakira ibyifuzo by’abaturage mu igenamigambi ry’umwaka wa 2026/2027, ndetse hanasobanurirwa abaturage Gahunda y’Iterambere ry’Akarere (District Development Strategy – DDS 2024–2029).

Mu Murenge wa Ndego, Umuyobozi w’Akarere ka Kayonza, Nyemazi John Bosco ar kumwe n’abagize inzego z’umutekano bifatanyije n’abaturage b’Akagari ka Byimana, abibutsa ko igenamigambi ry’Akarere rigomba gushingira ku bitekerezo by’abaturage kugira ngo ibikorwa bibagerereho bibe ibisubizo by’ukuri.

“Igenamigambi ryacu rikorwa hashingiwe ku bitekerezo by’abaturage. Iyo umuturage avuze ibimukomereye n’ibyo akeneye, tukabyandika tukabishyira mu bikorwa, iterambere riba irye kandi n’Akarere kakarushaho gutera imbere.” Nyemazi John Bosco.

Mukamana Vestine, umuturage wo mu Kagari ka Byimana, yemeza ko uburyo Leta ibasaba gutanga ibitekerezo bubagaragariza ko bafite agaciro mu iterambere ry’igihugu.

“Twishimira ko ibyo dusaba tubibona bishyirwa mu bikorwa. “Mu myaka yashize twasabye ko twabona amazi hafi, ubu umuyoboro warubatswe. Ubu abana bacu bajya ku ishuri kare, natwe tugakora imirimo yacu nta gukererezwa no kujya kuvoma kure. Ubu iyo batubajije ibyifuzo byacu, tubivuga dufite icyizere kuko twumva ko ijwi ryacu rifite agaciro.” Mukamana Vestine 

Muri izi nteko, abaturage banibukijwe inshingano zabo zirimo kwicungira umutekano, kugira isuku, gufasha abana kugaburirwa ku mashuri no kwitabira gahunda za Leta zose zigamije iterambere.

Abaturage bemeza ko iyi gahunda yo kwakira ibyifuzo byabo ibaha umwanya wo kugira uruhare mu igenamigambi, bigatuma ibikorwa bibageraho byubahiriza ibyo bakeneye koko.

Mu byifuzo abaturage  batanze harimo kwegerezwa amavuriro y'ibanze, kubakirwa imihanda ibafasha mu buhahirane n'ingendo zisanzwe, kwegerezwa abashuri yigisha imyuga n'ibindi. 

Iyi gahunda yo kwakira ibyifuzo by’abaturage mu igenamigambi izakomereza no mu yindi Mirenge yose y’Akarere muri uku kwezi, aho ubuyobozi buzakomeza kuganira n’abaturage ibitekerezo byatanga kuva ku rwego rw’Akagari kugera ku rwego rw’Akarere bikazavamo ibishyirwa mu ngengo y’imari ya 2026/2027 hashingiwe ku bikenewe kurusaha ibindi.