Mu murenge wa Ruramira akagari k'Umubuga, habereye ubukangurambaga binyujijwe mu ikinamico ''Umurage'', imbyino, imivugo n'ibindi, bwashishikarizaga abaturage gutanga umusanzu w'ubwisungane mu kwivuza kandi ku gihe.

Umunyamabanga wa Leta muri Minisiteri y'ubutegetsi bw'igihugu Mukabaramba Alvera yasabye abaturage kurushaho kwishyura umusanzu w'ubwisungane mu kwivuza, bakoresheje ikoranabuhanga ndetse banasobanurirwa uko bikorwa.

Yagize ati: ''turabasaba kujya mutanga mitiweri hakiri kare kuko kwishyura habura amezi 2 ngo umwaka urangire, ntacyo byaba bimaze. Ikindi mwibuke ko umuntu uzishyura nyuma y'ukwa cyenda azategereza ukwezi kugirango yemererwe kwivuriza kuri iyo mitiweri, mu gihe abarimo kwishyura kugera ukwa cyenda gushira, bemerewe guhita bivuza igihe bagize uburwayi''.

Umuyobozi w'akarere Murenzi Jean Claude mu butumwa bwe, yagize ati: ''turashimira abamaze gutanga mitiweri y'uyu mwaka. Abatarayitanga turabasaba kubyihutisha kuko twifuza ko abaturage bacu bagira ubuzima bwiza, kandi ntibwaba bwiza utabasha kwivuza igihe wagize ikibazo cy'uburwayi. Natwe nk'ubuyobozi, turongera imbaraga mu gukora ubukangurambaga.''

Gatanazi Longin Umunyamabanga Nshingwabikorwa w'umurenge wa Ruramira yagize ati: tubinyujije mu kwizigama mu masibo, abaturage b'umurenge wa Ruramira bamaze kwishyura mitiweri y'uyu mwaka kuri 86,4% akaba ariwo wa mbere mu karere ndetse no mu Ntara y'i Burasirazuba yose, kandi n'abasigaye bazayishyura vuba, kuko umwaka ushize twari twageze kuri 99%.