Mu rwego rwo kwigiranaho udushya, ibikorwa by'indashyikirwa no kumenyekanisha imihigo, Komite Nyobozi y'akarere, Abajyanama mu Nama Njyanama y'akarere, Inzego z'umutekano abanyamabanga Nshingwabikorwa b'imirenge n'utugari, abayobozi b'amashami ku Karare n'abandi, basuye ibikorwa bitandukanye mu murenge wa Rwinkwavu tariki 08 Gicurasi 2019

Mu bikorwa byasuwe, harimo icyumba cy’imihigo cy’umurenge wa Rwinkwavu, icy’akagari ka Nkondo, n’icy’umudugudu wa Nkondo II, basobanurirwa uburyo ikurikiranwa n'uko ishyirwa mu bikorwa, ndetse n'uko ibibazo bibangamira ubuzima bw'abaturage bikurikiranwa n'uko bikemurwa.

Habayeho kandi igikorwa cyo gutaha ku mugaragaro inyubako y’ibiro by’umudugudu wa Nkondo II abaturage biyubakiye ubwabo, hanatahwa amazu abiri yubatswe muri gahunda y'umuganda "Isano Dufitanye Iwacu" igamije kubonera abaturage ibisubizo babyishatsemo ubwabo bashingiye ku isano biyumvamo nk'ishingiro ry'Ubumwe n'Ubwiyunge.

Nkondo nk’akagari kagira udushya twinshi, no mu cyumba cy’imihigo udusangamo

Mukamusabyemungu Alice ni Umunyamabanga Nshingwabikorwa w’akagari ka Nkondo, asobanura ko udushya bagira no kwesa imihigo muri aka kagari, bituruka ku bufatanye abaturage bako bafite ndetse n’izindi nzego bakorana.

Yagize ati: “ku bijyanye n'ubwiza bw'iki cyumba, twakoresheje intebe za kinyarwanda kubera ko umuco wo guhiga tuwukomora ku bakurambere. Uzasangamo icumu n'ingabo, bisobanuye ngo: urugamba rw'iterambere ntirworoshye ntiwarujenjekera. Niyo mpamvu iryo cumu n’ingabo ari ngombwa. Uzasangamo ameza y'imihigo akoze mu ntare 2, iy’ingabo n’iy'ingore. Twashakaga gushushanya umurinzi w’ibyagezweho, ntawabisenya tureba. Ni ukuvuga ngo ibyo tumaze kubaka tubiha agaciro tukanabirinda”

Yakomeje muri aya magambo:  “imihigo ya Nkondo tuyisobanura twifashishije uburyo 3: inyandiko, amafoto na video, icyumba cy’imihigo nacyo kikaba kigizwe n’ibice 3: Tumenye Nkondo (amakuru asobanura neza akagari), icyumba cy'imihigo (amakuru asobanura imihigo y’akagari n’uko ishyirwa mu bikorwa) ndetse n’igice kigaragaza uko ibibazo bibangamira ubuzima bw'abaturage bikurikiranwa n'uko bikemurwa.

Batibuka Laurent umukuru w’umudugudu wa Nkondo II (umudugudu nawo uza imbere mu kugira udushya twinshi n’ubufatanye bw’abaturage muri aka kagari), yagize ati: “twahize imihigo 31 n’indi 2 y’udushya.

Harimo isuku n’isukura aho twavuze ko amazu yacu agomba gusa. Murabibona ameze neza (yose asize irangi rw’ubururu), mitiweri yo tuyesa 100% buri mwaka binyuze mu matsinda y’amasibo. Ubu, iy’umwaka utaha tugeze kuri 60% aho amasibo amaze kwizigama amafaranga angana na 1,114,000. Iy’ubuhinzi n’ubworozi (kuvugurura urutoki, guhuza ubutaka, girinka…), kugira uturima tw’igikoni na rondereza twabigezeho.

Mu ijambo rye, Umuyobozi w’akarere ka Kayonza Murenzi Jean Claude yagize ati: “iki gikorwa cyateguwe kugirango abantu bagende biga udushya cyangwa ibikorwa by’indashyikirwa biri ahandi, tukajya kubikoresha n’iwacu, kandi bidufashe guteze imbere serivisi dutanga, cyane cyane ku birebana n’imihigo.

Uru rugendo rwaje rukurikira kandi rwunganira igikorwa cyo gusura imirenge, aho Abajyanama b’akarere n’inzego z’umutekano bafatanyije twagiye mu mirenge hirya no hino mu cyumweru gishize, dukurikirana uko imihigo ishyirwa mu bikorwa, bikaba bidusaba gushyiramo ingufu aho twasanze bitameze neza.

Agendeye ku rugero rw’abaturage b’umudugudu wa Nkondo II, aho umuturage ukora akazi k’ubuhinzi ariwe wasobanuye neza imihigo y’umudugudu, yasabye abitabiriye uru rugendo-shuri gushyira hamwe, ibikorwa by’imihigo bakabigira ibyabo.

Yagize ati: “twabonye uko abaturage bashobora gufatanya n’ubuyobozi bakagera kuri byinshi. Murabona nk’iriya nzu biyubakiye y’umudugudu, ni urugero rwiza. Bigaragara ko natwe iwacu hari byinshi dushobora gukora. Birasaba kongera ubukangurambaga mu baturage kugirango babyumve neza nka bariya ba Nkondo II”.

Iyi gahunda: " Twese mu ngamba" izazenguruka mu mirenge yose igize akarere ka Kayonza, nyuma ya Rwinkwavu, ikazakomereza mu murenge wa Rukara.