Mu rwego rwo kwimakaza ubuyobozi bushyira umuturage ku isonga no gukemura ibibazo bigihari bibangamiye imibereho myiza y’abaturage, Ubuyobozi bw’Akarere ka Kayonza bukomeje gahunda yo guhura no kuganira n’abayobozi bo ku nzego z’ibanze kuva ku rwego rw’Umudugudu kugera ku rwego rw’Umurenge.

Kuri uyu wa 8 Nyakanga 2025, Umuyobozi w’Akarere, Nyemazi John Bosco ari kumwe n’inzego z’umutekano, yatagirije iyi gaahunda mu Murenge wa Rukara, ahahuriye abayobozi b’ibanze kuva ku mudugudu kugera ku murenge n’abahagarariye ibyiciro byihariye by’abaturage mu rwego rwo:

• Gusuzuma ishyirwa mu bikorwa ry’imihigo y’umwaka wa 2025–2026

• Kunoza imitangire ya serivisi zinoze kandi zihuse

• Gukemura ibibazo bibangamiye imibereho y’abaturage

• Gucunga neza umutekano no gukumira ibyahungabanya ituze rusange

• Gukangurira abaturage uruhare rusesuye mu iterambere ryabo n’ibindi.

Umuyobozi w’Akarere yagarutse ku nshingano z’inzego z’ibanze mu kwimakaza imiyoborere ishingiye ku baturage, agira ati “Tugomba gukomeza kwimakaza gahunda y’ubuyobozi bushyira umuturage ku isonga. Ibibazo bye tubimenye kare, tubikorere ubuvugizi, kandi tubishakire ibisubizo bikwiye kandi birambye.” 

Nyuma y’inama yabereye Rukara, ubuyobozi bw’Akarere bwakomereje iyi gahunda mu yindi Mirenge ya Kabarondo, Ruramira na Mukarange, aho bwahuye n’abayobozi b’inzego z’ibanze bungurana ibitekerezo ku mihigo, ibikorwa by’iterambere n’umutekano ndetse igi gahunda ikaba izanakomereza mu yindi Mirenge igize Akarere abayobozi bose bakaganirizwa. 

Abayobozi batandukanye bagaragaje ubushake n’ubufatanye mu gukorera abaturage, kwihutisha ibikorwa by’iterambere no kurushaho kunoza imikorere kugira ngo abaturage bagire uruhare mu bibakorerwa kandi bibagirire akamaro.