Kuri uyu wa Kane, Ubuyobozi bw’Akarere ka Kayonza bwakiriye itsinda ry’Abadepite bagize Komisiyo y’Ubumwe bw’Abanyarwanda, Uburenganzira bwa Muntu no Kurwanya Jenoside, bayobowe na Hon. Uwiringiyimana Philbert. Uru ruzinduko rugamije gusuzuma uko Politiki y’Igihugu y’Ubumwe n’Ubwiyunge yashyizwe mu bikorwa guhera mu mwaka wa 2020.

Mu biganiro byahuje aba Badepite n’ubuyobozi bw’Akarere, hagaragajwe intambwe imaze guterwa mu gushimangira ubumwe bw’abaturage, guharanira uburenganzira bwa muntu no kurwanya ingengabitekerezo ya Jenoside.

Umuyobozi w’Akarere ka Kayonza, Nyemazi John Bosco yagaragaje ko Akarere gakomeje gushyira imbere ibikorwa bigamije kwimakaza indangagaciro z’Ubunyarwanda, binyuze mu matsinda y’ubumwe n’ubwiyunge, ibiganiro mbwirwaruhame mu baturage, ibikorwa by’isanamitima ndetse n’ubufasha buhabwa abarokotse Jenoside yakorewe Abatutsi hagamijwe kuzamura imibereho myiza yabo.

Hon. Uwiringiyimana Philbert wari uyoboye itsinda ryasuye Akarere, yavuze ko uru ruzinduko rugamije gufasha Komisiyo gusuzuma ibyagezweho no kungurana ibitekerezo n’inzego z’ibanze ku buryo bwateza imbere ubumwe mu Banyarwanda. Yashimye ubufatanye buri hagati y’Akarere n’abaturage mu kubaka umuryango nyarwanda ushingiye ku mahoro, ukuri n’ubworoherane.

Abagize Komisiyo banasuye bimwe mu bikorwa bifitanye isano n’ishyirwa mu bikorwa rya Politiki y’Ubumwe n’Ubwiyunge, birimo amatsinda y’abaturage bakorana mu bikorwa by’ubukungu no kwimakaza indangagaciro z’ubwiyunge.