Mu rwego rwo gukomeza kwimakaza ubuyobozi bwegereye abaturage, Akarere ka Kayonza gakomeje gahunda yo kuganira n’abayobozi b’inzego z’ibanze kuva ku rwego rw’Umudugudu kugera ku Murenge. Iyi gahunda igeze mu mirenge ya Kabare, Rwinkwavu na Mwiri, aho abayobozi bungurana ibitekerezo ku ngamba zo kunoza imikorere no kurushaho kwegera abaturage.

Insanganyamatsiko y’iyi gahunda igaruka ku kwimakaza ubuyobozi bushyira Umuturage ku Isonga, binyuze mu kongerera ubushobozi abayobozi b’inzego z’ibanze ku bijyanye no gukemura ibibazo bikibangamiye imibereho myiza y’abaturage, kunoza imitangire ya serivisi, kugera ku ntego z’imihigo ya 2025/2026 no kurushaho kwita ku mutekano w’abaturage binyuze mu mwitozo ngiro.

Umuyobozi w’Akarere ka Kayonza, Nyemazi John Bosco yibukije abayoozi ko iterambere rirambye rishingira ku bufatanye hagati y’ubuyobozi n’abaturage, asaba abayobozi b’inzego z’ibanze gushyira imbere kwegera abaturage no gukemurira ibibazo aho byagaragaye.

“Ubuyobozi bwiza buhera mu Mudugudu, aho ikibazo kibonekeye kigakemurirwa aho.” Umuyobozi w’Akarere Nyemazi John Bosco 

Abayobozi b’inzego z’ibanze basabwe kugira uruhare rufatika mu gukorana n’abaturage, kumenya no gutanga amakuru ku bibazo n’ibyaha bikigaragara, kugira ngo babashe kubikemura hakiri kare.

Iyi gahunda ni igice cy’uruhare rw’Akarere mu kwimakaza imiyoborere ibereye abaturage, ikaba inagaragaza umuhate wo gukomeza gufasha inzego z’ibanze kugira ubushobozi bwo kuyobora neza no gutanga serivisi inoze.