Kuri uyu wa Gatatu tariki ya 21 Gicurasi 2025, ku Kigo cy’Urubyiruko cya Kayonza habereye amahugurwa yihariye yateguwe ku bufatanye bw’Akarere ka Kayonza na Banki ya Zigama CSS, agenewe abagore bafite abo bashakanye bakora mu nzego z’umutekano batuye mu Turere twa Kayonza na Gatsibo.

Aya mahugurwa yari agamije gukangurira abagore bashakanye n’abakora mu nzego z’umutekano kumenya no gukoresha serivisi za Zigama CSS, by’umwihariko gufata inguzanyo ziteza imbere imibereho yabo n’iy’imiryango yabo. Amahugurwa yibanze ku kumenyekanisha amahirwe atandukanye abagore n’abandi bashakanye n’abakora muri izi nzego bashobora kubyaza umusaruro binyuze mu bufatanye n’iyi banki isanzwe ifasha abakozi bo mu nzego z’umutekano.

Mu ijambo rye, Umuyobozi w’Akarere wungirije Ushinzwe Iterambere ry’Ubukungu, Munganyinka Hope, yashimye iki gikorwa cyiza cyateguwe na Zigama CSS, agaragaza ko gifite uruhare rukomeye mu guteza imbere umugore n’umuryango nyarwanda muri rusange.

Yagize ati “Turashimira Zigama CSS ku bw’iyi gahunda yatekerejweho kugira ngo umugore abashe kugira uruhare rufatika mu iterambere ry’umuryango. Turasaba abagore bose bitabiriye aya mahugurwa kudasiga inyuma amasomo bahakuye, ahubwo bakabyaza umusaruro ayo mahirwe no gukomeza gushaka amakuru yabateza imbere kubera ko umugore wiyubatse aba abaye urufunguzo rw’umuryango uteye imbere.”

Abitabiriye amahugurwa bagaragaje ko yaje ari igisubizo ku bibazo byinshi bahuraga na byo mu bijyanye no gucunga neza umutungo w’imiryango yabo, bemeza ko bagiye gukorana bya hafi na Zigama CSS mu rwego rwo kwiteza imbere.